إبراهيم أبوالعطا: ندمان على «ركلام» وربنا هيسألني لمست جسم الفنانة ولا لأ.. ومسرح مصر شبه الكباريه – موقع الموقع

كتبت أميرة السمان
أعرب الفنان إبراهيم أبو العطا، عن ندمه الشديد على دوره في فيلم ركلام، بجانب حديثه عن انتقاده مسرح مصر لـ الفنان أشرف عبد الباقي.
وقال ندمت على دوري في فيلم ركلام، وقولت لو رجع بيا الزمن مش هعمل الدور ده، لأن وأنا قاعد في السينما في العرض المفروض أني بعمل نفس اللي عمله فرج في فيلم الكرنك في الفنانة غادة عبد الرازق في فيلم ركلام، وكنت فرحان بالمشهد وقولت هبقى تريند، وبصيت لاقيت بنتي قاعدة بتتفرج جنبي وعيطت.
وتابع: هنا أدركت أن كل ما يتعرض مشهد الاغتصاب كل ما هاخد سيئة والرصيد بيزيد وربنا هيسألني عملت ده ولا لأ ولمست جسم الفنانة ولا لأ، وأنا عامل الفن ده علشان أكون خارج مخلص من الدنيا.
وعن انتقاداه لمسرح مصر: انتقدت فكرة مسرح أشرف عبد الباقي، وقولت أنها شبه الكباريه، لأن المسرح اللي اتربينا عليه زي المسرح القومي، ومسرح محمد صبحي وعادل إمام، مسرح مفيش فيه تهريج ولا أن أضرب زميلي بالقلم علشان أضحك الجمهور، إرمي إفيه وضحك الناس، لكن مترميش الإفيه على العاهة بتاعة زميلك علشان تخين أو رفيع أو قصير، هي دي كوميديا؟، دي ممكن تتعمل وإحنا قاعدين نشرب في بار زي أمريكا، وده سكران ومحدش فاهم وبيضحك وخلاص.
وتحدث الفنان إبراهيم أبو العطا، عن خضوعه لعملية تكميم المعدة، بجانب الكشف عن أمنيته التي لم يحققها حتى الآن.
وقال، عملية تكميم المعدة انقذتني من الموت لأن وزني كان 200 كيلو وجالي فشل في التنفس، ولكني ندمان عليها لأني مش مستمتع في حياتي وبقالي 6 سنين مبعرفش أكل، ولو أكلت حتة زيادة بيجيلي اختناق، وترتب على كمية الأكل القليلة جدًا دي سقوط في الشعر وضعف نظر والأسنان بتقع ووهن في قوة الإنسان لأنك لبعت في خلقة ربنا.
أما عن الصفات التي يمنتى أن تكون متواجد بشريكة حياته، فقال إبراهيم أبو العطا: تكون بتخاف ربنا وتتقي الله فيا، وتقدر لحظات السكوت اللي بحب أعيشها، وطيبة وبنت ناس زي أمي وإخواتي، وتكون عايزة تبني بيت وإنسان.
وأمنيته التي لم يحققها إلى الآن: أنا إلى الآن ممثلتش، نفسي في دور أخرج فيه اللي جوايا، ولسة بدور على الدور اللي يشبعني كممثل، ومحدش دور عليا علشان أعمله.
وطالب الفنان إبراهيم أبو العطا، الدكتور أشرف زكي، نقيب المهن التمثيلية، بترشيحه لأعمال فنية، معربًا عن حبه الكبير للنقيب.
وقال النقابة مش من صلاحيتها أنها تطلب من مخرج يشغل حد، والدكتور أشرف زكي حقاني في الموضوع ده، علشان كده أنا مطلبش منه أنه يشغلني، أنا عندي موهبة هي اللي تفرض نفسها، ولكن هو ممكن يزكي ويقول فلان الفلاني ظروفه تعبانة هاتوه في أي حاجة، ولكن أنا عمري ما لجأت له لشغل، ده رزق بتاع ربنا.
وتابع: دور النقابة الرقابة على المسلسلات وأفعال الممثلين والممثلات وجهات الإنتاج، ولما أنا أعيا النقابة تقف معايا وده حصل، وأشرف زكي هيتفكر مين ولا مين كان الله في عونه، وأنا بقوله من خلال البرنامج يا دكتور أشرف أنا بقولك أنا عايز أشتغل، ولو حبيت أنك تزقني في أي عمل هشرفك أنت اسم على مسمى أشرف وزكي.
وأضاف: دكتور أشرف زكي الساعة 4 الفجر اتصلت عليه بيرد وبيجي، وده مع الكل من أكبر نجم لأصغر زميل، وبنلاقيه في كل مكان علشان كده أنا مسميه سعادة السفير، هو سفيرنا في الوسط كله، جاء ذلك في لقائه مع الإعلامية إنجي هشام، في برنامج “المنسي” المذاع عبر شاشة قناة “هي”.

نسخ الرابط
تم نسخ الرابط

#إبراهيم #أبوالعطا #ندمان #على #ركلام #وربنا #هيسألني #لمست #جسم #الفنانة #ولا #لأ. #ومسرح #مصر #شبه #الكباريه #موقع #الموقع
تابعوا Tunisactus على Google News