المنجي الرحوي

أكد النائب بمجلس نواب الشعب المنجي الرحوي في تدوينة نشرها على صفحته الرسمية بموقع التواصل الاجتماعي “فايسبوك” أن “حل البرلمان واجب”

وقال النائب إنه سيتم اليوم خلال اشغال الجلسة العامة المصادقة على مشروع قانون يتعلق بـ”العفو على الكناطرية …  الكناطرية واللي هربوا فلوسهم للخارج.…”
وأضاف الرحوي في تدوينته بأن نسبة الحضور بالمجلس والتصويت ستكون عالية اليوم وانهم سيستنفرون قواهم وسيتسابقون ويتنافسون للدفاع عن هذا القانون.
وتابع “برلمان عصابة وكمشة مجرمة لابسين رابطات عنق ومكيجين ويتكلموا بالعربية الفصحى ولابسين الزي متع التجارة بالدين ويبداوا خطاباتهم باسم الله ويزينوه بآيات قرانية…”

ومن المنتظر أن يصادق البرلمان اليوم على جملة من مشاريع القوانين والتي من بينها “مشروع قانون يتعلق بإنعاش الاقتصاد وتسوية مخالفات الصرف. عـــــدد 104/2020”

وفي ما يلي نص التدوينة التي نشرها الرحوي : 


تذكير للي حبو يعملوه في افريل و ناوين يعملوه غدوة
بعد فضيحة مصادقتهم على الاحتلال القطري و خيانتهم لبلادهم في وقت اللي الشعب يعاني المر من المرض والجوع والخصاصة… في وقت اللي العباد قاعدة تموت قدام السبيطارات… في وقت اللي الوباء يحصد في الأرواح وعاطي مسد ماغير حتى إجراءات جدية من حكومة الذل والاهانة باش تجابهو وتعمل اللي يلزم تعملو كل حكومة وطنية تخمم في شعبها….. في وقت اللي المتقاعدين والشهارة نهار الكل يهددوا فيهم باش يوفرولهم الشهاري وإلا ما يوفروش … في وقت اللي بو يخرج وما يعرفش كيفاه باش يرجع وبشنوة باش يدخل لصغارو وما يقدرش يوفرلهم لقمة العيش …في وقت اللي الصناعي الصغير والتاجر الصغير واصحاب المؤسسات الصغرى والمتوسطة ماعادش يرقدوا ويعرفوا النوم من الشيكات الراجعة وتسكير البيبان من البنوك …في وقت اللي في ها البلاد الام تعدي نهارها تلاجي وتبكي ما تلقاش دوى لصغيرها والا حليبو…
في الوقت هذا الكل و بعد مهازلو الجمعة اللي فاتت مجلس النواب يعدي غدوة مشروع قانون العفو على الكناطرية …  الكناطرية واللي هربوا فلوسهم للخارج.…
غدوة تكون نسبة الحضور و التصويت عالية ويستنفروا قواهم باش يتسابقوا ويتنافسوا على شكون يدافع اكثر من غيرو على ها القانون…برلمان عصابة وكمشة مجرمة لابسين رابطات عنق ومكيجين ويتكلموا بالعربية الفصحى ولابسين الزي متع التجارة بالدين ويبداوا خطاباتهم باسم الله ويزينوه بآيات قرانية…
تعرفوشي علاه باش يعديوه القانون توة؟ على خاطر تونس صادقت على اتفاقية التبادل الآلي للمعلومات اللي باش تبدى توة حيز التنفيذ ويتكشفوا اللي عندهم اموال في الخارج….امالا عندهم برلمان يخدملهم الخدمة يعمللهم قانون عفو قبل ما يتكشفوا ويتعاقبوا…  يعمللهم عفو و يمنعهم ويضرب الباكو  علاه لا…
فهمتوشي هالحكومة حكومة شكون وهالبرلمان برلمان شكون…
حل البرلمان واجب

تابعوا Tunisactus على Google News