انطلاقا من تونس العاصمة : ملكة الكعلي تزور جربة بدراجتها الهوائية
انطلاقا من تونس العاصمة : ملكة الكعلي تزور جربة بدراجتها الهوائية
قامت مؤخرا التونسية ملكة الكعلي أصيلة قصر هلال بزيارة جربة على دراجتها الهوائية انطلاقا من تونس العاصمة .
هذه المبادرة الفريدة من نوعها , لقت موجة من الإعجاب لروح الشجاعة لهذه الفتاة و تحديها لصعوبات الطريق الطويل و الذي تقاس مسافته من تونس إلى جربة بـ500 كلم .
و عن تفاصيل هذه الرحلة كتب ملكة التدوينة التالية :
”علاقتي بالبسكلات علاقة قوية و حبي ليها ما نجمش نوصفوا، للناس و صوحابي لقراب مني يعرفوا إنوا في فترة ما كيف بعدت جاتني ضروف أقوى مني و سلمت أما فما حاجة فيا من داخل مش راكحة و في كل مرة نقول لازمني نرجع ندور و رجعتي المره هاذي كانت ببرشا موجات إيجابية و قررت بين ليلة و نهار باش نمشي من تونس الجربة بالبسكلات الحاجة الوحيدة إلي خممت فيها هو إنوا لازمني ناخذ كونجي و الباقي باش يجي بطبيعتوا..
حبيت نحكي على رحلتي بكل بساطة و بكل عفوية.. مش نفس الطاقة إلي خرجت بيها و مش نفس الطاقة إلي روحت بيها حاجة من وراء الخيال.. نتفكر و أنا في شارع الحبيب بورڨيبة بتونس 03:15 متاع الصباح بديت نوثق في الرحلة متاعي و ماكانش فيبالي باش يسمعوا بيها برشا توانسا.. خرجت بالإمكانيات إلي عندي ببرشا طاقة إيجابية و برشا حب للحاجة إلي نعمل فيها.. أول نهار كان في سوسة مرورا بالحمامات كان نهار طويل و أول مرة نعمل فيه مسافة طويلة تتجاوز 170 كيلومتر في نهار ، فما حاجات مانجمش نعبر عليهم بالكلام بالحق الكم الهايل متاع ناس الخير إلي عرضوني ملي خرجت من تونس للي وصلت الجربة حاجة من وراء الخيال.. بحكم الطقس تبدل شوية إضطريت إنوا نرتاح في المنستير و نتفكر نهار الإثنين شديت الثنية ل صفاقس مرورا بالجم و كيف خلطت نقول تي ملا جو عمري لا مشيت للجم و نهارت إلي ريت فيه أول مرة المسرح مشيت بالبسكلات! الناس إلي عرضوني في الكياس إلي يزمر خاصة نتفكر وقتلي وصلت للبلاكة متاع مرحبا بكم في ولاية ڨابس متاع نصيييييح و نڨز و ناس تزمر هههههه.
و بعد إكتشفت إنوا البلاكة أذيكا للي نوصل لڨابس مازالوا قريب 50 كيلومتر هههههه كنت ساعات نحس روحي نبسكل في المجهول خاصة و إنوا أنا كنت نبدأ صباح بكري و تبدأ ساعات الكياسات فارغة، ظلام. مالحاجات إلي عاوني إنوا لحقيقة عرفت كيفاه نقسم وقتي و خاصة أنا خطرت أوت و الطقس عامل من العوامل إلي كيف ما ينجم يعاونك كيف ما لا.. كل تصويرة عندها حكايتها و شيختها و هبالها.. تحديت روحي و كنت قد التحدي ”
#انطلاقا #من #تونس #العاصمة #ملكة #الكعلي #تزور #جربة #بدراجتها #الهوائية