هذا ما قالته رانيا العمدوني في أول تصريح لها من داخل السجن

كشف محمد علي بوشيبة محامي الناشطة رانيا العمدوني المتهمة بهضم جانب موظف عمومي والتي حكم عليها بالسجن 6 أشهر عن ما قالته من داخل سجنها وعن حالتها النفسية.

وجاء في تدوينة للمحامي بوشيبة أن رانيا العمدوني كانت قوية وصامدة ومبتسمة في سجنها وأنها قالت له أنها اليوم متمسكة أكثر بالدفاع عن الحريات وأن من يؤمن بفكرة ينتظر حصول كل شيء له.

وفي ما يلي نص تدوينة المحامي محمد علي بوشيبة:

رانيا العمدوني ناشطة في المجتمع المدني..

حكمت عليها محكمة الناحية بتونس نهار 4مارس ب6 اشهر سجن مع النفاذ العاجل من اجل تهمة هضم جانب موظف عمومي بالقول و بخطية قدرها 9400  من اجل تهمة احداث الهرج و التشويش…

الحكم القاسي هذا صدمة برشا ناس تعرف رانيا و حتى الناس الي ما تعرفهاش و اتابع في القضية متاعها عبر وسائل التواصل الاجتماعي و بعض وسائل الإعلام..

الحق الحق الحكم هذا صدمنا حتى احنا كفريق دفاع ترافع لاكثر من 3 سوايع و نصف حاولنا نبينوا فيه الخروقات القانونية …لكن الله غالب…

الحكم الابتدائي هذا تم استئنافو يوم 5مارس من طرف احد اعضاء فريق الدفاع…

اليوم مشيت زرت رانيا في الحبس و الحقيقة كنت خايف مالحالة الي ربما بش نلقى عليها رانيا بعد سماعها للحكم..لكن المفاجاة لقيت رانيا الي عرفناها قوية و صامدة و مبتسمة و قتلي:”… يا استاذ الي يقرر يدافع على فكرة و يؤمن بمبدا لازموا يكون حاضر و مستعد بش يصيرلوا الي صارلي…و قتلي انا اليوم متمسكا بالدفاع عن الحريات اكثر من اي وقت مضى…و ما نساتش بش تشكر كل من ساندها و ولو بكلمة…”

فعلا هكذا هم الناشطيين الحقيقيين في المجتمع المدني الي يؤمنوا فعلا بالعمل الي قاعدين يقوموا بيه…بعد ما قابلت رانيا تاكدت انها  حرة و انوا الي يؤمن بالحرية صعيب يتسجن و الا السجن يغيروا..

توى بش نستناوو تعيين جلسة الاستئناف الي عندنا امل بش تخرج فيها رانيا…

# سنواصل الدفاع عن كل الاحرار..

# الحي يروح…

# سيب رانيا و شد الفساد..”

تابعوا Tunisactus على Google News